खजुरा : बाँकेको खजुरामा जारी दशौँ डाँफे कप नकआउट फुटबल खेल प्रतियोगिताको फाइनलमा बैजनाथ -७ को नवज्योति युवा क्लब प्रवेश गरेको छ । स्वर्गीय गजबहादुर सिजाली स्मृतिको अवसरमा सञ्चालन गरिएको दशौँ डाँफे कपको मङ्गलबार सम्पन्न सेमिफाइनल खेलमा खजुरा गाउँपालिका – ८ घियाको पशुपति युवा क्लब लाई ०- २ गोल अन्तरले नवज्योतिले जित निकालेको हो । खेलको ६६ औँ मिनेटमा नवज्योतिका जर्सी नम्बर ८ का भूपेन्द्र शाहीले पहिलो गोल गरेका थिए । खेलको ७३ औँ मिनेटमा जर्सी नम्बर ७ का सन्दिप सिंहले दोस्रो गोल गरे । भूपेन्द्र र सन्दिपले गरेको गोल नै फाइनल पुग्ने नवज्योतिको कडी बन्यो । खेलको दौरानमा रेफ्रीसँग सामान्य विवाद हुँदा नवज्योतिका टिमकोच कृष्णचन्द्र ठकुरी लाई पहेलो कार्ड दिइएको थियो भने सपोर्टर दर्शकलाई पहेलो सँगै रातो कार्ड खेलको ७३ औँ मिनेटमा रेफ्री केवी शाहीले दिए । खेलको म्यान अफ द म्याच नवज्योति युवा क्लबका जर्सी नम्बर ७ का खेलाडी सन्दीप सिंहलाई घोषित गरियो ।
नेपालगञ्ज स्थित लाइफलाइन हस्पिटल र खजुरा १ नम्बरस्थित फायर फूड रेस्टुरेन्टले म्यान अफ द म्याच घोषित हुने सन्दिप सिंहलाई नगद ११ सय साथमा ट्रफी मेडल प्रदान गरे । सेमिफाइनलदेखि म्यान अफ द म्याच र उत्कृष्ट हुने खेलाडि लेलिन ब्राण्डको टिसर्ट साथमा झोला, कप र म्यागेजिन नेपालगञ्ज म्याराथनको तर्फबाट प्रदान गरिएको थियो । दशौँ डाँफे कपमा विजेता हुने टिमले नगद १ लाख ५५ हजार ५५५ प्राप्त गर्नेछन् । यस्तै उपविजेता टिमले ८० हजार ५५५ प्राप्त गर्नेछ । साथमा दुवै टिमले ट्रफी मेडल र प्रमाणपत्र प्राप्त गर्नेछन् । प्रथम पुरस्कारको राशि भने गत वर्षदेखि नै समाजसेवी लीलबहादुर थापाले सौजन्य गर्दै आएको प्रचार संयोजक खगेन्द्र दाहालले जानकारी दिए । प्रतियोगितामा उत्कृष्ट खेलाडीलाई ७ हजार ५००, उत्कृष्ट गोलकिपरलाई ५ हजार ५०० र उत्कृष्ट स्कोलरलाई ५ हजार ५०० रुपैया सहित मेडल र प्रमाणपत्र साथमा अन्य गिफ्ट समेत प्रदान गरिने क्लबका सचिव बलराम खत्रीले जानकारी दिए ।
बुधबार हुने दोस्रो सेमिफाइनल खेल आयोजक न्यु डाँफे स्पोर्ट्स क्लब र भिलेज होप राझा डुडुवा बीच अपरान्न ४ बजे हुने खेल संयोजक तिलकवीर सुनारले जनाए । बाँके जिल्लामा क्लबस्तरीय खेलमा खजुरामा न्यु डाँफे स्पोर्ट्स क्लब डि गाउँले सर्वाधिक राशि सहितको पुरस्कार राखेर खेल सञ्चालन गर्दै आइरहेको छ ।
दशौँ संस्करण सम्म सञ्चालन गरिरहेको न्यू डाँफेले अर्को वर्ष गोल्डकप खेल सञ्चालन गर्ने गरी तयारी गरिरहेको खेल संयोजक सुनारले जानकारी दिए । अहिले खजुराको मिनि रंगशालामा सञ्चालन भइरहेको दशौं डाँफे कपमा सहभागी हुने टिमहरूले व्यवसायिक खेलाडीहरूलाई प्राथमिकता दिएका छन् । खेललाई व्यावसायिक बनाउन खेलाडीहरुको आर्थिक अवस्थासमेत मजबुत हुनुपर्ने सहभागी टिमहरूको भनाइ छ । प्रतियोगितामा १६ वटा टिमले सहभागिता जनाएका छन् । दशौँ डाँफे कप चैत्र ९ गतेदेखि सुरु भई चैत्र २१ गते सम्पन्न हुनेछ ।
