हास्य अभिनेता जितु नेपाल र अभिनेत्री साम्राज्ञी राज्यलक्ष्मी शाहको शीर्ष भूमिका रहेको फिल्म ‘ह्यारी कि प्यारी’को प्रोडक्सनका कार्य भारतको मुम्बईमा गरिएको छ । कमेडीमा जमेका जितु र रोमान्टिक अभिनेत्रीको छबि बनाएकी साम्राज्ञीको पहिलो सहकार्य रहेको फिल्मलाई डा. कपिल रिजालले निर्देशन गरेका हुन् ।
रोमान्टिक, कमेडी जनरामा निर्माण भएको फिल्मले माघ २० गतेलाई प्रदर्शन मिति तोकेको छ । रिलिजको लागि २ महिनाको समय बाँकी रहँदा फिल्मको टिम भने यतिबेला बलिउड नगरी मुम्बई पुगेको छ ।
मुम्बईको चर्चित प्राइम फोकस स्टुडियोमा ‘ह्यारी कि प्यारी’को पोस्ट प्रोडक्सनको कार्य भइरहेको छ । प्राइम फोकसले यसअघि ‘ओम शान्ति ओम’, ‘मेरी कोम’, ‘पा’, ‘गुरु’, ‘गजनी’, ‘एक भिलेन’, ‘कयामत’, ‘धडक’, ‘गुड न्युज’ जस्ता थुप्रै बलिउड सिनेमाको सम्पादन गरिसकेको छ ।
नेपालमा पर्याप्त प्रोडक्सन स्टुडियो भए पनि राम्रो नतिजा दिन मुम्बईको अत्याधुनिक स्टुडियोमा प्रोडक्सन कार्य थालनी गरिएको निर्देशक रिजाल बताउँछन् । ‘ह्यारी कि प्यारी’का मुख्य सहायक निर्देशक गिरिराज घिमिरे मुम्बईमा काम गर्दा टेक्निकल रूपमा सजिलो हुने बताउँछन् । साथै प्राइम स्टुडियोका कर्मचारीहरूले दिएको सम्मान र कामप्रतिको लगावले आफूलाई प्रभावित बनाएको उनले बताए ।
फिल्मका छायांकार सुदीप बराल मुम्बईमा पोस्ट प्रोडक्सनको काम गर्दा प्राविधिक रूपमा फिल्म अब्बल हुनेमा विश्वस्त छन् ।
‘नेपालमा हामीले सीमित स्क्रिनमा हेरेर डीआईको काम गर्नुपर्छ । यहाँ सम्पादन गर्दा हलको रेजुलेशनमा कस्तो दृश्य देखिन्छ भन्ने कुरा देख्न पाइन्थेन । मुम्बईमा भने हलको प्रोजेक्सनकै लेभलको स्क्रिनमा सम्पादन गर्न पाउँदा डिटेलिङमा देखिन्छ । नेपालमा प्रायः हलहरूमा टुके प्रोजेक्सन हुन्छ भने यहाँ हामीले फोरकेमा सम्पादन गरिरहेका छौँ’, छायांकार सुदीप बरालले मुम्बईको कामले नेपालमा पनि प्राविधिक शिक्षा अझ विस्तार हुने आशा बोकेका छन् ।
फिल्म सम्पादनको लागि मुम्बई पुगेका अभिनेता जितु नेपाल त्यहाँको स्टुडियोले नेपाली फिल्मलाई दिएको माया र सम्मानको कदर गर्छन् ।
‘गजनी’, ‘तारे जमीन पर’, ‘पिके’, ‘गोलमाल’, ‘थ्री इडियट्स’, ‘सिंघम’ जस्ता बलिउडका चर्चित फिल्ममा साउण्ड मिक्सिङको काम गरिसकेका सुवीर दासले ‘ह्यारी कि प्यारी’मा साउण्ड मिक्सिङ गरिरहेका छन् ।
पहिलो पटक नेपाली फिल्ममा कलरको काम गरेका प्राइम स्टुडियोका सिनियर कलरिस्ट मनोज बर्मा नयाँ अनुभव प्राप्त गर्न पाएको बताउँछन् । साथै उनी नेपाली फिल्मलाई बलिउड जतिकै प्राथमिकता राखेर काम अगाडि बढाएको बताउँछन् । उनका अनुसार ‘ह्यारी कि प्यारी’मा बलिउड फिल्म ‘बजरंगी भाइजान’को लेभलको कलरको काम भएको छ ।
स्टुडियोका प्रोडक्सन हेड निर्मल गाला आफूहरूले राम्रो काम दिने र समय मै फिल्मको काम सकाउने बताउँछन । उनले २० वर्षे लामो करिअरमा ८ सय बढी फिल्मको काम गरेका छन् । फिल्मको लागि ब्याकग्राउण्ड म्युजिसियनको काम गरेका बापीले ‘ह्यारी कि प्यारी’ मनोरन्जनको प्याकेजिङ भएकाले संगीत दिन मज्जा आएको बताए ।
‘ह्यारी कि प्यारी’ निर्देशक डा. कपिल रिजाल कै प्रस्तुतिमा निर्माण भइरहेको छ ।
