राप्ती सोनारी गाउँपालिकामा पालिका स्तरीय राष्ट्रपति रनिङ शिल्ड तथा अध्यक्ष कप खेलकुद प्रतियोगिताको तयारी सकिएको छ । लक्ष्मी माध्यमिक विद्यालय राप्ती सोनारी–२, मदुईको आयोजना व्यवस्थापनमा हुन गैरहेको १४ औं राष्ट्रपति रनिंग शिल्ड तथा अध्यक्ष कप चौथौं खेलकूद प्रतियोगिताको सम्पुर्ण तयारी सकिएको विद्यालयका सहायक प्रध्यानाध्यापक गणेस वलिले जानकारी दिए ।
प्रतियोगिताको उदघाटन राप्ती सोनारी गाउँपालिकाका अध्यक्ष लाहुराम थारुले गर्ने आयोजकले जनाएको छ । फागुन १८ देखी २१ गतेसम्म रनिङ शिल्ड प्रतियोगिताको उदघाटन अघि केहि प्रतियोगिता हुने सहायक प्रध्यानाध्यापक वलिले जनाए । उद्घाटन अघि कक्षा १ देखि ३ र ४ देखि ५ सम्मकालाई गणित दौड गराइने भएको हो ।
त्यस्तै, आधारभुत ६ देखि ८ सम्मकालाई १००,२०० र ४०० मिटरको दौड गराइनेछ । उद्घाटन पछि भने माध्यमिक तहका दौड लगाएत अन्य खेल प्रतियोगिता हुने छ । टाढाका विद्यार्थिहरुका लागि विद्यालयले बसाईको व्यवस्था समेत गरेको जनाएको छ ।
टाढाका विद्यार्थिहरु प्रतियोगिता सुरु हुने भन्दा अघिल्लो दिन मंगलबार (आज) नै आइपुगेका छन । रनिङ शिल्ड प्रतियोगितामा राप्तीसोनारी गाउँपालिका क्षेत्रभित्र रहेका सामुदायिक र संस्थागत गरी करिव ७२ वटा बिद्यालयले सहभागिता जनाउने भएका छन् ।
